Башкы прокуратура Атамбаевдин арызы боюнча сотко чейинки өндүрүш ишин баштады

Башкы прокуратура Атамбаевдин арызы боюнча сотко чейинки өндүрүш ишин баштады
30-Май 2019, Бейшемби, 12:35

Экс-президент Алмазбек Атамбаевдин жазган арызынын негизинде сотко чейинки өндүрүш иши башталды. Бул тууралуу башкы прокуратуранын басма сөз кызматы билдирди.

Маалыматка караганда, Алмазбек Атамбаев өзүнүн иш бөлмөсүнө тыңшоочу аппараттарды коюу аракети болгонун айтып, Башкы прокуратурага арыз жазган.

“Расмий арыз 27-майда келип түшкөн. Бул кайрылууну буга чейин башталган сотко чейинки өндүрүштүн материалына тиркедик. Ага ылайык, анын жүйөлөрү боюнча тергөө иштери жүрүп, дыкат иликтенет. Териштирүүнүн жыйынтыгында юридикалык баа берилет” – деп билдирди Башкы прокуратура.

Аскер прокуратурасы 24-майда Кылмыштардын жана жоруктардын бирдиктүү реестрине «Жеке жашоонун кол тийбестигин бузуу», «Кат алышуулардын купуялуулугун бузуу» жана «Кызмат абалынан кыянаттык менен пайдалануу» беренелери менен каттаган.

КСДП партиясынын саясий кеңешинин мүчөлөрү экс-президент Алмазбек Алмазбек Атамбаевдин жана партия мүчөсү Фарид Ниязовдун иш бөлмөсүнө тыңшоочу аппараттарды коюу аракети болгонун айтып чыккан эле.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!
КӨП ОКУЛГАНДАР