Ош шаарында майрамдык иш-чаралар өтүүдө

Ош шаарында майрамдык иш-чаралар өтүүдө
10-Окт. 2019, Бейшемби, 12:38

“Ош Түрк дүйнөсүнүн маданий борбору" иш-чарасынын алкагында “Ош шаары түрк тилдүү мамлекеттердин фотосүрөтчүлөрүнүн көзү менен” аттуу сүрөт көргөзмөсү өткөрүлдү.

Оштогу “Алымбек Датка” этнографиялык комплексинде, Түрк дүйнөсүнүн фотосүрөтчүлөрүнүн Оштогу он алтынчы жолугушуусунун аткагында “Ош Түрк дүйнөсүнүн фотосүрөтчүлөрүнүн көзү менен” аттуу сүрөт көргөзмөсүнүн ачылыш аземи болду.

Ага Ош шаарынын вице-мэри Нурбек Кадыров, ТҮРКСОЙдун КРдагы өкүлү Кожогелди Култегин, Түрк дүйнөсүнүн фотосүрөтчүлөрү, шаар тургундары жана жаштар катышты. Көргөзмөгө 12 сүрөтчүнүн 3төн сүрөтү – жалпысы 36 сүрөт коюлду.

Анда сүрөтчүлөр Ош шаарын жана облусун чагылдырган.

Эскерте кетсек, буга чейин Түрк дүйнөсүнүн фотосүрөтчүлөрү Оштун көрүнүктүү жерлери Сулайман-Тоону, борбордук базарды кыдырып, Ош шаарынын күнү – элдик майрамын сүрөткө тартышкан.

Ошондой эле, Ноокат районунда жайгашкан Абшыр-Ата шаркыратмасын, кыргыз айылдарын, жаратылыш көрүнүштөрүн да сүрөткө тартып кайтышкан.

Ал эми, Ош шаарынын 3019 жылдык мааракесине карата А.Сүйүмбаев атындагы борбордук стадиондо чоң программадагы гала-концерт менен жыйынтыкталды

Концертте Өзбекстан, Казакстан жана Кыргызстандын эстрада жылдыздары Сыймык Бейшекеев, Нурлан Насип, Кайрат Примбердиев, Асел Касымова, Бахтияр Токторов жана Ош шаардык маданият башкармалыгынын бий топтору өз өнөрлөрүн көрсөтүштү. Майрамдык концертке 12 миңге жакын адам күбө болду.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!
КӨП ОКУЛГАНДАР