Бажы кызматы: 10 айдын жыйынтыгы боюнча 4,5 млрд сом чогулбай калган

Тилек Нурбеков

Ушул жылдын 10 айдын жыйынтыгы боюнча 4, 5 млрд сом пландык тапшырмага жетпей калган. Бул тууралуу Бажы кызматынын жетекчиси Алтынбек Торутаев парламенттин жыйынында билдирди.

Ал акча каражатынын көлөмү пландык тапшырмага жетпей калганын мындайча түшүндүрдү.

“Эң биринчи себеби – бул импорт 10 пайызга төмөндөп кетти. Биздин товардык өнөктөш катары эсептелип келген Кытайдан келген жүктөр 12 пайызга төмөндөп кетти. Мына ушул тенденция болгону үчүн пландык аткарылышка чыкпай калдык”, – деди ал.

Депутат Алтынбек Жунус уулу Бажы кызматынын бюджети 50 млн сомго көбөйгөнү менен аткезчиликке бөгөт коюуга багытталган иш-чаралардын натыйжасы начар болуп жатканын айтып, Бажы кызматынын ишмердүүлүгүн сынга алды.

“50 млн сомго ушулардын чыгымын көтөргөндөн кийин эффект да көбүрөөк болушу керек деп өкмөт ишенип бергенден кийин жыйынтыгын көрүп жатасыздар. Аткезчилик-аткезчилик деп эле айтып келатабыз. Таластан, Чалдовардан, жалгыз эле чек ара кызматына ишенип отура бербей, башка кызматтарды да коюп көрсөңүз. Өтө көп аткезчилик болуп жатат”, – деди Жунус уулу.

Бүгүн Жогорку Кеңеш республикалык бюджеттин беш жылдык мыйзам долбоорун карап жатат. Жыйынга премьер-министр Мухаммедкалый Абылгазиев башында турган өкмөт мүчөлөрү, мамлекеттик органдар менен мекемелердин жетекчилери катышууда.

Сүрөт: Sputnik.kg