Ошто Нооруз майрамына даярдык кызуу жүрүүдө
Ош шаарынын мэриясы “Нооруз-2017” элдик майрамын өткөрүүгө даярдык көрүп жатат.
Мэриянын коомчулук менен байланыш бөлүмү билдиргендей, майрамды уюшкандыкта өткөрүү максатында шаар мэри Айтмамат Кадырбаевдин буйругу менен уюштуруу тобу түзүлүп, иш-чаралар бекитилген.
Анын алкагында шаар ичи, майрамдык аянттар, эс алуу жана сейил бактары майрам шаанисинде жасалгалануу зарылдыгы табышталды. Ошондой эле аймактык кеңештердин төрагаларына шаардык мекеме-уюмдардын жетекчилери менен биргеликте «Нооруз-2017» элдик майрамын элдик көөнөрбөс каада-салттарга ылайык өткөрүү милдеттендирилди.
Нооруз майрамы, 21-март күнү шаардын борбордук аянтында саат 09:00дө “Нооруз – жаңылануунун жана жакшылыктын жарчысы” аттуу театрлаштырылган оюн-зоок, концерттик чоң программа менен башталат. Майрамдык иш-чара спорттун улуттук түрлөрү боюнча мелдештер менен уланат. Ал саат 12:00дөн 15:00го чейин болот. Ага утурлай Ош улуттук драм театрында «Нооруз берекеси» аттуу жарманке уюштурулат. Ошондой эле, майрам күнү саат 09:00-16:00га чейин Бабур театрынын алдында майрамдык программа өтөт.
20-21-март күндөрү “Өчпөс от” мемориалдык комплексинин алдына сүрөтчүлөр тарабынан “Ыйман, адеп жана маданият” жылына арналган көргөзмө болот.
Ал эми, 20-март күнү борбордук аянтта «Сармерден» улуттук оюн-зоок иш-чарасы менен чечендик өнөр боюнча таланттуулардын жарышы, «Алымбек датка» этнографиялык борборунда, “Семетей” кино театрында, “Каныкей”, “Жеңиш”, “Ата-Түрк” эс алуу жайларында Ош шаарындагы жогорку окуу жайлары тарабынан уюштурулган, элдик каада-салтка ылайык оюн-зоок, майрамдык маданий программа даярдоо, боз-үй тигүү, сүмөлөк даярдоо каадасы уюштурулат.