Үч күндө унаа кырсыгынан 22 адам каза тапты

Кубанычбек Жусупбеков

Акыркы учурда Кыргызстандын аймагында унаа кырсыгы көп катталууда. Өзгөчө кырдаалдар министрлигинин маалыматына таянсак, үч күндүн ичинде унаа кырсыгынан 22 адам каза тапты. Арасында жаш балдар дагы бар.

Алсак, 5-ноябрь күнү Бишкектин Айтматов көчөсүндө 2 унаа кагышып, анын кесепетинен 5 киши каза болгон. 6-ноябрь күнү саат 20:22 чамасында Бишкек Манас аэропорту унаа жолунда "БМВ" үлгүсүндөгү мамлекеттик №S52-94АК жеңил унаанын айдоочусу рулду башкара албай жолдон чыгып бакты сүзгөн. Анын кесепетинен 5 адам каза тапкан. Ушул эле күнү Бишкек-Ош жолундагы унаа кырсыгынан 10 киши каза көз жумган. Анын дээрлик көпчүлүгү 23 жаштын тегеригиндеги жаштар болушкан.

Ал эми 7-ноябрь күнү кечинде Чоң Чүй каналына (БЧК) Peugeot үлгүсүндөгү унаа түшүп кеткен. Окуя ГЭС-5 менен Жер-Казар айылдарынын ортосунда болгон. Окуя болгон жерге куткаруучулар барганга чейин унаанын ичиндеги айдоочунун аялы, бир уулу жана бир кызы унаадан чыгып кетишкен. Бирок, айдоочу менен 2011-жылы туулган уулу окуя болгон жерде каза болгон.