Кыргызстандык спортчу бүгүн мелдешке чыгат

Мирбек Кумаков

Түштүк Кореянын Пхенчхан шаарында XXIII кышкы Олимпиада оюндарына катышып жаткан Кыргызстандык спортчу Евгений Тимофеев бүгүн слалом боюнча мелдешке катышат. Олимпиаданын ырааттамасы боюнча Евгений Тимофеевдин Бишкек убактысы боюнча саат 7:15те жарышы башталат.

Учурда кышкы олимпиадага Кыргызстандын атынан эки спортчу катышууда. Алар Тариэль Жаркымбаев 13-февралда "кросс-кантри" кыска аралыктагы лыжа жарышында 4 мүнөт 05,99 секундда маарага жетип, чейрек финалга кирбей калган. Ал эми экинчи спортчу Евгений Тимофеев адегенде 18-февралда гигант слалом боюнча жарышка катышып, 63 кезекте маарага жеткен(2мүнөт 41,03 секунд). Лыжа жарышына жалпысынан 102 спортчу ат салышкан. Бүгүн болсо Евгений Тимофеев слалом боюнча мелдешке катышат.

Слалом - лыжа менен тоодон ылдый катуу ылдамдыкта жарышуу(450-500 м), араларына соңуна чейин кыска дарбазалар коюлган. Спортчу туурасы 3,5 - 4 метр болгон дарбазаларды кулатпай аралып өтүүсү керек. Лыжачынын ылдамдыгы саатына 40 км болуусу шарт.

Эсиңиздерге сала кетсек, кышкы Олимпиада оюндары Түштүк Кореянын Пхёнчхан шаарында 2018-жылдын 9-февралынан 25-февралына чейин өтөт. Жалпысынан кышкы олимпиадага дүйнөнүн 2 900 спортчусу катышууда.